Manfrotto Pocket 迷你腳架

text: Yesun | photo: Yesun | post on: 24-Jun-2011

個包裝入面就得四件嘢，腳架、裝拆用嘅鎖匙一條、尼龍袋一個、後備鑼絲一粒（見到粒後備鑼絲就心知不妙）。隻腳架只係重 70g，呢隻腳架係預計你長時間裝佢係相機嘅底部唔拆出嚟。放係凹凸不平嘅地方，或者放係檯面進行自拍，都相當方便。佢嘅承重力，一般的入門單反加 Kit Len 都可以應付，或者裝閃光燈進行飛燈拍攝亦可。

點解頭先話見到粒後備鑼絲就心知不妙呢？因為通常啲廠都無咁好死嘅，送得粒後備鑼絲俾你，即係話粒鑼絲好容易唔見啦，以下有 Video 為證。仲有就係條裝拆鑼絲嘅鎖匙，當隻腳架收起嘅時候，條鎖匙的確係有地方放嘅，但係用緊個陣，條鎖匙就唔知點咁，有少少阻住晒。如果唔帶條鎖匙，個腳架又好難拆得返出嚟。以上呢兩個缺點，都係因為設計者諗住你裝左呢隻腳架之後係唔會再拆，咁用就一啲問題都無囉。

咁如果我成日都要裝裝拆拆咁點解決呢？方法好簡單，走去鴨寮街買粒有柄嘅鑼絲，盛惠 15 個大洋。果條鎖匙，以後都可以唔使帶喇！至於粒鑼絲好容易就會跌出嚟呢個問題，呢粒有柄嘅鑼絲，係解決唔到嘅！因為佢大粒左，所以重左，仲容易跌。不過 15 蚊就解決到嘅問題，如果真係跌左，買過粒啦！