Canon 320EX 改裸燈

之前我買左兩支 Canon 320 EX 返黎，其中一支就係為左攞黎改 360 度光源嘅閃燈，呢種閃燈其實係無一種正式嘅名，因為佢無反光罩同埋聚焦，所以通常大家都叫佢做裸燈。點解要自己改唔去買？因為以前最出名嘅 Sunpak 120j 已經停產左無得賣，而另外一隻 Quantum 又貴到買唔落手。究竟點解要用呢種閃光燈？係燈光人像攝影，好多時都要打背景光同埋髮邊光，如果地方唔夠大，Model 距離背景又太近，根本無位落燈，而呢種情況，360 度嘅閃光燈就非常好用。只要將支燈擺係 Model 嘅背脊，就可以同時打光背景同埋令到 Model 有髮邊光嘅出現，我主要係咁用，其實用途重有好多。

以下是拍攝效果相片

加左背燈的效果

無加背燈的效果

至於點樣改法， 因為改嘅時候我無影低相片，而我又唔想拆開支已經改好左嘅閃光燈，所以過程欠奉，而且難度相當高，因為 Canon 有無線功能的閃光燈，燈頭內部係有檢視閃光燈輸出的元件，我初時都以為只要將支閃光管改係閃光燈外面就已經得，但係原來咁樣做，支閃光燈會次次都 Full Power 嘅，必須要將支閃光燈的光引返入去燈頭入面，支閃光燈先會變返正常嘅無線 TTL，所以難度非常之高。改到一半幾乎失敗，差啲無左千八蚊，到最後都係的起心肝特登整返件零件將啲光由燈管引返入個燈頭裡面。係我未諗到一個簡單的改裝方法之前，我都唔會再改第二支。